பிரிதலும் சேர்தலும்

 

சொந்தங்கள் ஒன்று சேர்ந்ததும்

பிரிந்தும்​,

​அவர்கள் பிரிந்து சென்றதும்

ஒன்று சேர்ந்துமாய்​

நிற்கின்றன,

​திருமண மண்டப

நாற்காலிகள் !

சருகின் இறுதி ஆசை

 

காற்றே...

என்னை சற்று முன்னமே உதிர்த்து விட்டாய்...

பரவாயில்லை.

எனினும் சிறிது நேரம் வீசுவதை 

நிறுத்திக்கொள்...

என்னை இத்தனை நாள் உயரப்பிடித்த 

மரத்தின் காலடியை 

முத்தமிட்டு விடுகிறேன்...

பிறகு மீண்டும்  வீசிக்கொள். 

தேங்க்ஸ் கிவ்விங்

நான் சைவமாக மாறியதற்கு 

நன்றி நவின்றது...

வான் கோழி

சும்மா இரு

 

கடவுள் இருக்கும் இடத்திற்கு 

பூ 

எடுத்துச் சென்றான் 

பக்தன்... 

பூ 

இருக்கும் இடத்திலேயே 

கடவுள் இருப்பதை அறிந்த 

ஞானி... 

சும்மா இருந்தான் 

அமரர் ஊர்தியும் சர வெடியும்

மார்ச் மாதம்...

போக்குவரத்து நெரிசல்,    

மார்ச்சுவரி செல்லும் 

அமரர் ஊர்தி...

சர வெடிப் பட்டாசு, 

சத்தம் அடங்கியதும் 

புகையுடன் ஒரு வாசம், 

ஏனோ எனக்கு மட்டும் 

அது மகிழ்ச்சியாய் 

தீபாவளியை 

நினைவு படுத்தியதில் 

ஒரு கணம் இன்பம்...

மறு கணம் நெருடல்...

"சரி சரி 

அந்த ஆன்மா சாந்தி அடையட்டும்",  என்று 

அவசரமாய் நினைத்து விட்டு 

நகர்ந்தேன்.

பூ வாசம்

 

காசு குடுக்காமலே

பூக்கடையில் கிடைக்கிறது

பூ வாசம்!

பிரதிபலிப்பு

 

மழை நீர் தேக்கம் ...

விடியலில் புதியதாய் 

பிரதிபலித்தது அதிலே  

உதய சூரியன்